CrossFire LewensTransformasie/Life Transformation (CLT)

Ons naam, CrossFire LT, bestaan uit twee baie belangrike aspekte rakende die Koninkryk van God, soos duidelik is uit die Woord van die Here:
Eerstens, die “CROSS” (oftewel “KRUIS”) verwys na die kruis van Jesus Christus waaraan Hy gesterf het vir die sondes van alle mense en daardeur versoening bewerk het tussen God en mens. Wat baie belangrik is, is dat Hy nie slegs gesterf het nie, maar ook opgewek is uit die dood en daarom getriomfeer het oor die dood, hel en bose magte. Deur die rekonsiliasie wat Jesus aan die kruis bewerk het, is ons in staat om in `n persoonlike verhouding met Hom, sy Vader en die Heilige Gees te staan. Hierdeur het Jesus vir ons die geskenk van ewige lewe saam met Hom in die hemel moontlik gemaak. 

Tweedens, die “FIRE” (“VUUR”) verwys na die vuur wat die Heilige Gees in `n mens se gees aan die brand steek. Dit is slegs moontlik na `n ware ontmoeting by die kruis van Christus waar sondebelydenis plaasvind en jy weergebore word. Die Heilige Gees word ontvang as geskenk van die Vader en die Seun wanneer jy Christus as Here en Verlosser aanneem (Joh. 7:37-39). Hy troos en bemoedig ons, rus ons toe met gawes, gee ons krag in swakheid en lei ons in die waarheid van die Woord. Ongelukkig is dit nie altyd sigbaar in mense se lewe nie: hulle sit dikwels die kerkbanke vir jare warm sonder om volledig vir Jesus Christus te leef. Hierdie “vuur” verwys dus na die dinamiese en kragtige vervulling (dunamis) van die Heilige Gees in `n persoon se lewe. Dit is wat die reuse verskil maak in die vestiging van sy Koninkryk hier op aarde.